Brouwer's Akkordeonorkest waard begjin maaie 1955 oprjochte troch de bekende akkordeonpedagooch Marten Brouwer
út Gytsjerk. It hiet doedestiids "Skoalleorkest fan Brouwer's Muzykskoalle" en bestie út
de bêsten ûnder de leden fan al syn oare orkesten, oanfolle mei
útblinkers ûnder de
learlingen fan syn oer heal Fryslân fersprate akkordeonskoalle. It ensemble fersoarge tal fan optredens en
makke, neist inkele grammofoanplaten, in grut tal radio-opnamen. Brouwer stoar, 47 jier âld, yn 1963 nei
de lieding oerdroegen te hawwen oan Johan de With.
De namme fan it orkest waard fan dat stuit ôf "Brouwer's Akkordeonorkest".
Tradysjes as: gjin elektroanika, gjin slachwurk, sa folle mooglik orizjinele muzyk, "klassyk-akkordeonorkest" wurk neist folksmuzyk, binne bewarre bleaun.
Muzyk út it oan akkordeon-muzyk sa rike
Noard- en East-Europa is mei entûsiasme ferwolkomme, en gâns arranzjeminten en komposysjes spesiaal
foar dit orkest seagen it ljocht, net allinne fan de hân fan de dirigint en oare orkestleden
(benammen Hotze Jelsma) mar ek fan oare komponisten (û.o. Jan Masséus en Gerard Ammerlaan).
Konserten binne en wurde jûn, foaral yn Fryslân, mar ek yn oare Nederlânske provinsjes en
yn it bûtenlân (Italië, Dútslân).
Gearwurking mei oare ynstruminten hat ynspirearjend wurke (fan it oan dit orkest opdroegen "Concertino
voor dwarsfluit en accordeonorkest" fan Jan Masséus oant in mienskiplike plaatopname mei de folkgroep
Irolt), lykas twa produksjes tegearre mei de dûnsgroep Duende in
útfiering fan "Sân" yn it Haarlimske Concertgebouw, as fertsjintwurdiging fan Fryslân op de Manifestatie Nederlandse Muziek 1986
wie dêryn in hichtepunt. Ek treedt BAO regelmjittich op as begelieding fan koar- of solosang (û.o. mei
de Sneker Cantorij), en mei fioelesolo. Yn 2004 waard foar it earst gearwurke mei in brassband (De Bazuin Oentsjerk).
Nei in fiiftal platen binne oant no ta sân CD's ferskynd dèr't it orkest, allinne of tegearre mei oare musisi,
op te hearren is ien mei as tema: folksmuzyksuites, ien mei Fryske fokale muzyk tegearre mei it Mingd Koar
Grou, ien yn gearwurking mei Irolt, ien mei akkordeonmuzyk fan Jacob de Haan, ien mei muzyk útjân by
De Haske en yn april 2005 in dûbel-CD ("50 jier Brouwer's Akkordeonorkest") mei in seleksje út
fiif desennia skiednis en rippertwaar yn ferbân mei it gouden jubileum fan it orkest.
De
oprjochter
Marten Brouwer waard berne op 26 septimber 1915 as soan fan in skútsje-skipper. Oant syn 12e jier ta kaam
er syn skoalplicht nei, om dèrnei oan it wurk setten te wurden oan board fan heite skútsje. Op syn
18e waard er siik, en yn'e rin fan ien jier fan wer betterwurden learde er himsels it akkordeonspyljen oan.
Dèrmei fermakke er syn doarpsgenoaten yn Gytsjerk, dêr't er him yntiid nei wenjen set hie.
Pakt troch it ynstrumint en mei it ynsjoch, dat it akkordeon méar betsjutte as in skippers-klavier,
in "folks"ynstrumint dus, ferkocht er syn fyts en tôgde him in nije akkordeon oan. Ûnderwilens wied er úteinset mei in brânje- en oaljehannel en
bestege er syn frije oerkes oan it yn'e macht krijen fan it akkordeon.
Yn 1939 troude er en begûn mei lesjaan oan ien learling mar al ridlik gau groeide dat oantal en dat laatte
lang om let ta de oprjochting fan in akkordeonskoalle (letter mei oare ynstruminten oanfolle ta muzykskoalle),
en fan "Brouwer's AkkordeonClub" (BAC) yn 1946. Yntusken wreide syn muzykskoalle him út mei
fèstigingen,ferspraat oer de hiele provinsje Fryslân, naam it learlingetal al mar ta en waarden
hieltyd mear lesjouwers oansteld. Nei ferrin fan tiid waarden ûnder syn besieljende lieding syn bêste
orkestleden en útblinkende learlingen út alle wynstreken fan de provinsje selektearre foar de
oprjochting, yn begjin maaie 1955, fan it "Skoalleorkest fan Brouwer's Muzykskoalle".
Op 8 maaie 1963 rekke Marten Brouwer wei. By syn ferstjerren droech er de lieding fan it orkest oer oan
de hjoeddeiske dirigint, Johan de With. It orkest waard, mei it opgean fan de ferskate âfdielingen fan Brouwer
syn skoalle yn de oanbelangjende gemeentelike muzykskoallen, omdope ta "Brouwer's AkkordeonOrkest" (BAO).
|